كيفاش يكف الدم متاع جرح صغير

مايا شلبي

عادي بروحي نقص في قرين فلفل و كعيبات طماطم للسلاطة, السكينة تزلق و تتشقلب و تقصلي صبعي (لا لا موش صبعي الكل لاباس لاباس هههه) أما الجرح حسيتو غارق شوية و الدم ما حبش يكف نمشيشي فتيتة الدم إلي عندي تمشي زادة هههه

أول حاجة عملتها حطيت صبعي تحت الماء و النتيجة كانت عكس ما كنت انتظر الدم ماشي و يزيد يهرهر أنا هكة و نتفكر فازة سمعت بيها قبل : الفلفل الأكحل يقص جريان الدم!!

الحق أول ما خممت فيها لحمي قشعر تي هو يشوي اللسان خلي تحطو على جرح!!

المشكلة الدم ما حبش يكف و يلزم نكمل نطيب حتى باش نلقى ما نستقات و نرجع الدم إلي خسرته ههههه أيا قلت ما فيها وين تي هات نجرب تي أنا بطلة ولدت مرتين إلي يقلك موش لعب, موش تشلحيطة فلفل أكحل باش تخوفيني

وخرت و قدمت و حطيت دوزة باهية على صبعي…

See Also

المفاجأة الأولى إنو ما يحرقش جملة!! و المفاجأة الثانية و الأهم إنو الدم كف بالوقت

لا ما فيهاش يلزم نفهم شنية الحكاية..  بربشت شوية في الأنترنات و اكتشفت إلي الفلفل الأكحل عنده قدرة متاع تخثير الدم مما يخلي الدم يشيح على الجرح باش يكون كي الغطاء يحمي الجرح

ما تنساوش تدعيولي دعيوة خير عاد!

What's Your Reaction?
Excited
0
Happy
0
In Love
0
Not Sure
0
Silly
0
View Comments (0)

Leave a Reply

Your email address will not be published.

© 2019 BINETNA. All Rights Reserved.

Scroll To Top