وقتلي تحب تتفكر و تتفكر ما تحبكش

 

إيناس الجنفاوي

من بين النتائج السلبية للحبالة و الرضاعة و تقدم السن هو إنو مخك يولي كسكاس و النقب متاعه وااااسعة و من بين تبعات ذلك : تبدا تنسى العباد و أساميهم…

تدخل لمحل تجاري و إلا أي بلاصة عامة و قلبك يدعي إن شاء الله ما نطيح بحد هو يعقلني و أنا مانعقلوش!! و إنت و زهرك ساعات يڤبضو عليك و تتعدا لحظات مريرة من التغصوير!!

و هذا إلي صارلي هاك النهار نشوف فيها تغزرلي و تعاود و أنا نتمتم : يا ستار يا مخلص الأوحال

جاتني تجري.. و أنا في قلبي

: اتخذت!! افصع افصع!!! خلطت عليا..

مصرة الأخت!!

هي : فلاااانة (تعرف إسمي) وينك سافا؟؟ هالغيبة عاش من شافك!!

(أنا : (ضحكة متلهة) أهلاااا بيك ايييه يا حسرة ( و أنا لا نتفكر إني ريتها قبل أصل)

(هي : (تحكي و تسأل و تحكي و تسأل

(أنا : (نعصر في مخي و نركز مع كلامها) هههه (الضحكة المتلهة أعلاه

هوني ماعندك حل كان إنك تركز و تلوج على الأدلة و البراهين في سياق الحديث و تثبت على آنا حقبة من الزمان هي تحكي : المكتب و إلا المعهد و إلا الجامعة و إلا خدمة من الخدم و تثبت في الأسامي إلي تسألك عليهم و ابدا ادعي إلي تذكرلك اسم تعرفو و برا عاد كان تزيد تسرح بيك و تحكيلك على أسامي هوما بيدهم ناسيتهم غادي وين تزيد تشنع : علاه أمان شعمتلك؟؟ أنا كنت نعاني باش نطلع اسمك إنت تزيد تلهدني بأسامي أخرين؟؟

و مازالت تحكي تحكي تحكي و أنا السؤال الوحيد إلي يدور في مخي : إنت مين يا ست إنت؟؟؟!!! و بديت نسرححح و بدا التبهليل يظهر على وجهي و ظاهر مانيش نتفاعل معاها..

و إنت مازلت مرهوجة و تتغصور توخر و تقدم و تسألك السؤال المحرج إياه :

عرفتني ماهو؟؟؟؟؟؟

تحسها حطت آمال حياتها الكل في الإجابة متاعك و تتعدا لحظات ثقييييلة و إنت ماكش عارفة آش تقول تخاف ترمي اسم و ما تسلكش و تخاف تقوللها الحقيقة المرة تحطمها خاصة كان معاها شكون نبزة عظيمة قدامه.. في اللحظات هاكي تبرد و تسخن و تعرق و تسب العلماء خاطر ما اخترعوش حاجة تعاونك على الإنفساخ و تسب مخك المحثول الفاشل إلي ما نجمش يطلع اسم و تتمنى يكون عندك القدرة إنك تقرا الأسامي كي تشوف وجه عبد.

ما نطولش عليكم لمدت شجاعتي و و جاوبتها متلعثمة :

تفكرتك تفكرتك أما ذكرني بإسمك و بره..

لحظات صمت رهيب..

هي : ووه أنا فلانة نسيييتنيييي؟؟

أنا : هههه ( نفس الضحكة المتلهة) آآآ برا برا كنت متأكدة أما خفت نغلط في الاسم سامحني وينك سافا؟؟

الظاهر ما أقنعتهاش خاطر زادت كليمتين و مشات و هي تتشوحر..

المصيبة في الحكاية الكل إلي لحد الآن مازلت مانيش متذكرتها……. تبا

What's Your Reaction?
Excited
0
Happy
0
In Love
0
Not Sure
0
Silly
0
View Comments (0)

Leave a Reply

Your email address will not be published.

© 2019 BINETNA. All Rights Reserved.

Scroll To Top